ABŞ Prezidenti Donald Tramp Rusiya ilə Ukrayna arasında daha genişmiqyaslı atəşkəsin əldə olunmasına çalışdığını bildirib.

Amerika lideri bu barədə “Fox News” telekanalına müsahibəsində danışıb.

Onun sözlərinə görə, ABŞ-ın birinci xanımı Melaniya Tramp iki ölkə arasında humanitar təşəbbüslərdə mühüm rol oynayıb.

“Melaniya Ukrayna və Rusiya ilə bağlı çox yaxşı iş görüb, bir çox gözəl insanlarla əməkdaşlıq edib. İndi isə biz daha genişmiqyaslı varianta keçirik”, – deyə Tramp bildirib.

ABŞ Prezidenti qeyd edib ki, əvvəlki təşəbbüslər çərçivəsində insanların şəhər və yaşayış məntəqələrindən təxliyəsi həyata keçirilib və bu, çox güman ki, onların həyatını xilas edib.

“Bu, atəşkəs idi. İndi isə eyni işi daha geniş miqyasda həyata keçirəcəyik”, – deyə Tramp vurğulayıb.