İranın İslam İnqilabı Keşikçiləri Korpusu (SEPAH) ABŞ-nin Bəhreynin Ər-Rifa və Əvali şəhərlərindəki bazalarının raket və dronlarla hədəf alındığını açıqlayıb.

"Tasnim" agentliyi xəbər verir ki, bu barədə SEPAH bəyanat yayıb.

Bəyanatda qeyd olunub ki, ABŞ dronlarının İranın hava məkanını pozmasından sonra bu ölkənin sözügedən bazalardakı "Patriot" hava hücumundan müdafiə sistemlərinə məxsus iki radar SEPAH-ın Aerokosmik Qüvvələrinin hücumuna məruz qalıb.

"İslam İnqilabı Keşikçiləri Korpusu xəbərdarlıq edir ki, İran İslam Respublikasının hava məkanı ölkənin silahlı qüvvələrinin qırmızı xəttidir və İranın hava məkanının hər hansı təcavüzkar ölkə və qüvvə tərəfindən pozulmasına İslam döyüşçüləri sərt və qəti cavab verəcəklər", - bəyanatda deyilir.




***
23:46

İran İslam İnqilabı Keşikçiləri Korpusunun (SEPAH) Bəhreyndə yerləşən iki ABŞ hərbi bazasına hücum etdiyi bildirilir.

“Fars” xəbər agentliyinin məlumatına görə, Şeyx İsa və Əl-Cüfeyr hərbi bazaları hədəfə alınıb.

Agentlik hücumun ABŞ-ın hərəkətlərinə cavab olaraq həyata keçirildiyini bildirib.

Hücumun nəticələri və mümkün itkilər barədə məlumat verilməyib. SEPAH hələlik hücumla bağlı rəsmi açıqlama yaymayıb.

Bəhreynin Daxili İşlər Nazirliyinin “X” sosial şəbəkəsində yaydığı məlumata görə, İranın hücumu nəticəsində mülki sənaye obyektində yanğın baş verib

“İranın hücumu nəticəsində mülki sənaye obyekti hədəfə alınıb və hadisə yerində yanğın başlayıb”, – deyə nazirliyin açıqlamasında bildirilib.

Mülki müdafiə qüvvələri yanğının söndürülməsi istiqamətində iş aparırlar.

İlkin məlumatlara əsasən, hücum nəticəsində maddi ziyan dəyib, xəsarət alanlar barədə məlumat daxil olmayıb.