Fransanın müxtəlif şəhərlərində qiymət artımına qarşı keçirilən etiraz aksiyaları zamanı 144 nəfər saxlanılıb.

“BFMTV” telekanalının ölkənin Daxili İşlər Nazirliyinə istinadən verdiyi məlumata görə, gün ərzində 112 nümayiş təşkil olunub.

Nazirliyin məlumatına əsasən, aksiyalarda ümumilikdə 82,5 min nəfər iştirak edib. Təşkilatçılar isə iştirakçı sayının 150 min olduğunu bildirirlər.

Ən böyük nümayiş paytaxt Parisdə keçirilib.

Paytaxt polisinin hesablamalarına görə, Parisdə 21,5 min nəfər küçələrə çıxıb. Aksiya təşkilatçıları isə bu rəqəmin 45 min olduğunu açıqlayıblar.

Yerli vaxtla saat 18:00-a olan ilkin məlumata əsasən, ölkə üzrə 144 nəfər saxlanılıb. Saxlanılmaların səbəbləri açıqlanmayıb.

Fransa Daxili İşlər Nazirliyi son həftələr ərzində həm etiraz aksiyalarının, həm də iştirakçıların sayında azalma müşahidə olunduğunu bildirib.