Hollivudun iki əfsanəvi siması - aktrisa Qlenn Klouz və rejissor Ridli Skott uzun illər davam edən parlaq karyeralarında ilk dəfə “Oscar” heykəlciyinə layiq görülüblər.
“Qafqazinfo” xəbər verir ki, ABŞ Kino Sənətləri və Elmləri Akademiyasının Los-Ancelesdə keçirilən 17-ci illik Fəxri Mükafatlar mərasimində hər iki sənətkar kino sənayesinə verdikləri əvəzsiz töhfələrə görə təltif ediliblər.
Karyerası ərzində səkkiz dəfə “Oscar”a namizəd göstərilməsinə baxmayaraq, heç vaxt bu mükafatı qazana bilməyən 79 yaşlı Qlenn Klouz salonda ayaq üstə alqışlarla qarşılanıb. Mükafatını qızına həsr edən aktrisanı səhnəyə “Təhlükəli əlaqələr” filmindəki tərəf müqabili Con Malkoviç dəvət edib. Malkoviç həmkarını “əsl usta” adlandıraraq onun risk etməkdən çəkinməyən cəsarətli sənətçi olduğunu vurğulayıb.
İlk nominasiyasını 1983-cü ildə qazanan Klouz təəssüratlarını bölüşüb: “Qalib gəlib-gəlməyəcəyim barədə heç vaxt narahat olmamışam, baxmayaraq ki, bəzi illərdə şansım ola biləcəyini düşünürdüm. Həmişə ən böyük şərəfin məhz o salonda olmaqda olduğunu hiss etmişəm”.
“Yadplanetli”, “Ülgüc üzərində qaçan” və “Qladiator” kimi kult filmlərin müəllifi, 88 yaşlı britaniyalı rejissor Ridli Skott da doqquz uğursuz nominasiyadan sonra ilk “Oscar”ını əldə edib. Mərasimdə şəxsən iştirak edə bilməyən rejissor təşəkkürünü videomüraciət vasitəsilə çatdırıb. Skottun mükafatını 2015-ci ildə “Marslı” filmində birgə çalışdığı aktyor Mett Deymon təqdim edib.
“Hamımızın onu əlində “Oscar” mükafatı ilə görməyimizin vaxtı çoxdan çatmışdı”, - Deymon deyib.
Gecədə həmçinin 1956-cı ildən “Walt Disney Animation Studios”da çalışan, “Meri Poppins” və “Cəngəllik kitabı” kimi klassiklərin yaradılmasında iştirak edən 91 yaşlı əfsanəvi animator Floyd Norman da fəxri mükafat alıb. Studiyanın ilk qaradərili animatoru olan Norman hisslərini “Bəzən real həyatda da filmlərdəki kimi xoşbəxt sonluqlar olur. Bu xüsusi gecə mənim xoşbəxt sonluğumdur” sözləri ilə ifadə edib.
Kino dünyasının nüfuzlu simalarını bir araya gətirən mərasimdə Kristofer Nolan, Tom Holland, Şarliz Teron, Oliviya Uayld və Penelopa Kruz kimi məşhurlar da iştirak ediblər.