Modelyer Şəlalə Maqsudova ev heyvanının ölümü ilə bağlı baytarlıq klinikasını günahlandırıb. O, sağlam vəziyyətdə qısırlaşdırılmaq üçün klinikaya aparılan pişiyinin əməliyyatdan sonra xəstələndiyini və həyatını itirdiyini bildirib.
Ş.Maqsudova baş verənləri sosial şəbəkə hesabında açıqlayıb.
Onun sözlərinə görə, o, noyabrın əvvəlində pişiyini qısırlaşdırmaq məqsədilə Yasamal rayonunda yerləşən “Rvet” Baytarlıq Klinikasına aparıb. Əməliyyatı baytar Ruslan Ələkbərov həyata keçirib.
Ş.Maqsudova iddia edir ki, klinikaya müraciət zamanı pişiyə qurd dərmanı verilmədiyini bildirsələr də, baytar dərmanın səhər verilməsini, əməliyyatın isə günorta aparılmasını təklif edib. Lakin əməliyyatdan sonra heyvanın vəziyyəti pisləşib. Modelyerin bildirdiyinə görə, pişik üç gün ərzində qusub, sonradan aparılan müayinələr zamanı isə virusa yoluxduğu məlum olub. Bütün müdaxilələrə baxmayaraq, heyvanın həyatını xilas etmək mümkün olmayıb.
Modelyer klinikanın davranışı ilə bağlı da ciddi narazılığını ifadə edib:
"Əməliyyatdan sonra heyvan üç gün qusdu. Aparılan analizlər nəticəsində pişiyin virusa yoluxduğu məlum olub. Onu xilas etmək mümkün olmadı. Klinikaya özümüz müraciət etməsəydik, pişiyin ölümü ilə bağlı bizə məlumat vermirdilər. Heyvanın cəsədini zibil torbasında bizə verdilər. Özü də heyvanların yoxlanıldığı klinika natəmiz haldadır.
Paylaşımından sonra sözügedən klinikadan şikayət edən çoxsaylı insan mənə yazıb. Sonradan digər baytarlarla məsləhətləşdik, qurd dərmanı ilə eyni gündə əməliyyat aparılmasının düzgün olmadığını və bunun heyvanın immunitetinə mənfi təsir göstərə biləcəyini öyrəndik".
Modelyer məsələ ilə bağlı aidiyyəti qurumlara müraciət etdiklərini də açıqlayıb. O, hadisənin araşdırılmasını və məsul şəxslərin hərəkətlərinə hüquqi qiymət verilməsini tələb edir./yenisabah/