Dövlət satınalmalarında fəal iştirak edən və milyonluq tenderlərin qalibi seçilən “Ricon” MMC və onun direktoru Rəşad İsmayılov məhkəmə tərəfindən ümumilikdə 4 500 manat cərimələnib.
NOCOMMENT.az xəbər verir ki, şirkət və onun direktoru barəsində Əmək və Əhalinin Sosial Müdafiəsi Nazirliyi yanında Dövlət Əmək Müfəttişliyi Xidmətinin Bakı şəhər İdarəsi tərəfindən İnzibati Xətalar Məcəlləsinin 529.1-1-ci maddəsi ilə protokol tərtib edilib.
Məhkəmə materiallarından məlum olub ki, şirkətin direktoru Rəşad İsmayılov daha əvvəl əmək qanunvericiliyinin pozulmasına görə 1 500 manat inzibati cərimə olunub. Lakin həmin cərimənin ödənilməsi ilə bağlı qərarın icrası təmin edilməyib.
Dövlət Əmək Müfəttişliyi Xidməti şirkətə və direktoruna müraciət edərək cərimənin direktorun əməkhaqqından tutulmasını, bunun mümkün olmadığı təqdirdə isə müvafiq səbəblər göstərilməklə sənədlərin geri qaytarılmasını tələb edib.
Bununla bağlı şirkətin elektron kabinetinə bildirişlər göndərilsə də, tələb olunan tədbirlər görülməyib. Nəticədə həm MMC, həm də direktor barəsində inzibati xəta haqqında protokol tərtib edilərək məhkəməyə göndərilib.
Məhkəmə araşdırması zamanı Rəşad İsmayılovun “Ricon” MMC-də direktor vəzifəsində çalışdığı, əmək müqaviləsində aylıq əməkhaqqının əvvəlcə 2 269,71 manat, daha sonra isə 400 manat müəyyən edildiyi üzə çıxıb.
Məhkəmə şirkətin işəgötürən kimi cərimənin əməkhaqqından tutulmasını təmin etməli olduğunu, bu öhdəliyin yerinə yetirilməməsinə görə həm hüquqi şəxsin, həm də vəzifəli şəxsin məsuliyyət daşıdığını qeyd edib.
Bakı şəhəri Xətai Rayon Məhkəməsinin qərarı ilə “Ricon” MMC 3 000 manat, şirkətin direktoru Rəşad İsmayılov isə 1 500 manat cərimələnib.
Beləliklə, şirkət və direktor barəsində tətbiq edilən cərimələrin ümumi məbləği 4 500 manat təşkil edib.
Qeyd edək ki, “Ricon” MMC 11 iyun 2004-cü ildə dövlət qeydiyyatına alınıb. Şirkətin nizamnamə kapitalı cəmi 20 manatdır. Qanuni təmsilçisi İsmayılov Rəşad Rəhim oğludur.
Açıq mənbələrdə şirkətin fəaliyyəti barədə geniş məlumata rast gəlinmir. MMC-nin veb-səhifəsi olsa da, hazırda aktiv deyil. Şirkətin qanuni təmsilçisi Rəşad İsmayılov haqqında da açıq mənbələrdə ətraflı məlumat yoxdur.
Araşdırma zamanı o da məlum olub ki, “Ricon” MMC əvvəllər “RVR LTD” MMC adı ilə fəaliyyət göstərib. Qaynarinfo
