Bakı Ağır Cinayətlər Məhkəməsində “Azenco” Açıq Səhmdar Cəmiyyətinin keçmiş rəhbəri Vüqar Əliyevin növbəti məhkəmə prosesi keçirilib. 3 milyon 700 min manat mənimsəmədə ittiham olunan sabiq sədrin işi üzrə şahid qismində şirkətin hazırkı sədri Pərviz Hacıyev dindirilib.
NOCOMMENT.az xəbər verir ki, proses zamanı maraqlı detallar və sərt mübahisələr yaşanıb. Musavat.com xəbər verir ki, hakim Neymət Məmmədovun sədrliyi ilə keçən iclasda əvvəlcə “Azenco”nun nümayəndəsi prosesin qapalı keçirilməsini xahiş edib. O, şirkətin həm ölkə daxilində, həm də xaricdə geniş əlaqələrə malik olduğunu əsas gətirərək, müzakirə olunan məsələlərin ictimaiyyətə açıqlanmasını məqsədəuyğun saymayıb. Lakin müdafiə tərəfinin etirazından sonra məhkəmə vəsatəti təmin etməyib.
Dindirilmə zamanı “Azenco”nun İdarə Heyətinin hazırkı sədri Pərviz Hacıyev bildirib ki, Vüqar Əliyevi 2023-cü ildən tanıyır və şirkətdə bütün maliyyə məsələləri onun birbaşa nəzarətində olub.
Şahid qeyd edib ki, şirkət Özbəkistandakı tərəfdaşlarla işlərin görülməsi üçün əvvəlcə 16 milyon manatlıq müqavilə bağlamağı planlaşdırıb: "Sonradan Vüqar Əliyev məbləği əvvəlcə 14 milyona, sonra isə 8 milyon manata saldı. Səbəbini soruşanda Özbəkistan şirkətinin maliyyə imkanlarının çatmadığını dedi. Biz bu layihədən cəmi 3 milyon qazanc götürdük".
Pərviz Hacıyev Sinqapurda yerləşən hər hansı şirkətlə tender müqaviləsi bağlanmasından isə xəbərsiz olduğunu vurğulayıb.
Hazırkı sədr gündəlik maliyyə hesabatlarını nəzərdən keçirərkən bəzi kənar xərclər aşkarladığını deyib: "Maliyyə hesabatlarında gördüm ki, gül dükanından bir gündə 15 min manatlıq gül alınıb. Vüqar Əliyevə şifahi xəbərdarlıq etdim. O isə cavab verdi ki, Energetiklər Günüdür, hədiyyə almaq lazımdır".
Təqsirləndirilən Vüqar Əliyev isə öz növbəsində heç bir qanunsuzluğa yol vermədiyini bildirib və qeyd edib ki, ona heç bir rəsmi və ya şifahi xəbərdarlıq edilməyib. O, əsas qərarların və xarici müzakirələrin “Azərenerji”nin keçmiş rəhbəri, aralarında "şef" adlandırdıqları Etibar Pirverdiyevin nəzarəti ilə həyata keçirildiyini iddia edib.
Məhkəmədə müdafiə tərəfinin Etibar Pirverdiyevin rolu və "Nur" MMC ilə bağlı ünvanladığı sualların bir çoxu dövlət ittihamçısının etirazı ilə protokoldan çıxarılıb və cavablandırılmayıb.
Buna baxmayaraq, vəkil Nurlan Məmmədov diqqətçəkən bir iddia səsləndirib: "Etibar Pirverdiyev şirkətdə məsləhətçi işləyib və 55 min manat əməkhaqqı alıb. Heç adi bir məsləhətçi bu qədər yüksək maaş alar?"
İclasın sonunda Vüqar Əliyevin barəsindəki həbs qətimkan tədbirinin dəyişdirilməsi ilə bağlı vəsatətə də baxılıb. Vəkil müvəkkilinin beş azyaşlı uşağının olduğunu və şahidlərə təsir göstərmək iddiasının əsassız olduğunu qeyd etsə də, hakimlər heyəti vəsatəti təmin etməyib. Məhkəmə prosesi növbəti iclasda davam etdiriləcək.
Xatırladaq ki, Vüqar Əliyev 1 il əvvəl DTX tərəfindən saxlanılıb. O, Cinayət Məcəlləsinin 179.4-cü (mənimsəmə - xüsusilə külli miqdarda törədildikdə) maddəsi ilə ittiham olunur və bu maddə 10 ildən 14 ilədək azadlıqdan məhrumetmə cəzası nəzərdə tutur.
Növbəti məhkəmə prosesində şahidlərin dindirilməsinin davam etdirilməsi gözlənilir. Proses noyabrın 16-da davam etdiriləcək.\\musavat.com
