Çinin Şençjen şəhərində keçirilən Asiya-Sakit Okean İqtisadi Əməkdaşlıq (APEC) Liderlər Zirvəsi zamanı Yaponiyanın Baş naziri Sanae Takaiçi ilə Malayziyanın Baş naziri Ənvər İbrahim arasında maraqlı anlar yaşanıb.

“Qafqazinfo” xəbər verir ki, rəsmi iclas başlamazdan əvvəl iki liderin salamlaşması zamanı Takaiçinin gözlənilməz jesti kameraların obyektivinə tuş gəlib.

Görüntülərdə Ənvər İbrahimin əllərini birləşdirərək salamlaşmasına cavab verməyə çalışan Sanae Takaiçinin bir anlıq tərəddüd edərək əllərini çarpaz şəkildə qaldırdığı görünür. Bundan dərhal sonra gülümsəyən Yaponiya Baş naziri başını azca yana əyərək, gözlərini geniş açıb və qısa müddətə dilini çıxarıb.

Rəsmi diplomatik tədbirdə qeydə alınan bu kadrlar qısa zamanda sosial mediada viral olub və istifadəçiləri iki yerə bölüb. Bəziləri Takaiçinin bu davranışını səmimi, təbii və yumoristik hal kimi qiymətləndirsə də, digər istifadəçilər belə bir jestin yüksəksəviyyəli diplomatik sammitin etiket qaydalarına uyğun olmadığını bildiriblər.