Təhsil sektorunda uzun illər mühüm vəzifələrdə çalışan bir sıra şəxslər dövlət idarəçiliyindəki fəaliyyətlərindən sonra akademik mühitə üz tutublar. Onların bir qismi universitetlərdə rəhbər vəzifələr tutub, digərləri isə pedaqoji fəaliyyətlərini davam etdirirlər.

Bu baxımdan, Azərbaycanın ilk ali təhsil ocağı olan Bakı Dövlət Universiteti (BDU) diqqət çəkir. Belə ki, vaxtilə təhsil siyasətinin formalaşmasında və idarə olunmasında iştirak edən bir sıra tanınmış şəxslərin karyerasında bu universitet xüsusi yer tutur.

NOCOMMENT.az xəbər verir ki, İnfoxəbərTv həmin şəxslərin karyera yolunu və hazırda tutduqları vəzifələri araşdırıb.

Misir Mərdanov

Misir Mərdanov 1989-cu ildən 1992-ci ilin oktyabr ayına qədər Təhsil Nazirliyində Ali Təhsil İdarəsinin rəisi və nazir müavini vəzifələrində çalışıb. 1992-1996-cı illərdə BDU-nun tədris işləri üzrə prorektoru, 1996-1998-ci illərdə isə universitetin rektoru olub.

Onun karyerasının mühüm mərhələsi 1998-ci ildən 2013-cü il aprelin 18-dək davam edib. Həmin dövrdə Misir Mərdanov Azərbaycanın təhsil naziri vəzifəsini tutub.

2026-cı ilin yanvar ayından etibarən isə sabiq nazir BDU-nun Mexaniki-riyaziyyat fakültəsində kafedra müdiri vəzifəsini icra edir.

İradə Hüseynova

İradə Hüseynova 1985-2005-ci illərdə Bakı Dövlət Universitetində müəllim kimi fəaliyyət göstərib. 2002-ci ildə təhsil nazirinin müavini vəzifəsinə təyin olunan Hüseynova 2011-ci ilədək bu vəzifədə çalışıb.

Sabiq nazir müavini hazırda BDU-nun Qafqaz xalqları tarixi kafedrasının müdiridir.

İlham Pirməmmədov

İlham Pirməmmədov 1998-2013-cü illərdə Təhsil Nazirliyinin aparat rəhbəri, 2013-2016-cı illərdə isə nazirin müşaviri vəzifələrində çalışıb.

Daha sonra Azərbaycan Texniki Universitetinin elm və texnika üzrə prorektoru vəzifəsinə təyin edilib. Bununla yanaşı, BDU-nun Nəzəri mexanika kafedrasında pedaqoji fəaliyyətlə də məşğuldur.

Məleykə Abbaszadə

Məleykə Abbaszadə 1994-cü ildə Tələbə Qəbulu üzrə Dövlət Komissiyası (TQDK) sədrinin birinci müavini vəzifəsinə təyin edilib. 1996-2000-ci illərdə sədr vəzifəsini müvəqqəti icra edib, 2000-2016-cı illərdə isə komissiyaya rəhbərlik edib.

2016-cı ildə TQDK-nın bazasında Dövlət İmtahan Mərkəzi (DİM) yaradıldıqdan sonra onun Direktorlar Şurasının sədri olub. 2024-cü ildən DİM-in İdarə Heyətinin sədri vəzifəsini tutub.

2026-cı il noyabrın 19-da vəzifəsindən azad edilən Məleykə Abbaszadə Bakı Dövlət Universitetinin rektoru təyin olunub.