Tbilisinin Poniçala qəsəbəsində yaşayış binasında baş verən partlayış nəticəsində dağıntılar altında qalan sonuncu şəxsin də meyiti çıxarılıb.

"Report"un Gürcüstan bürosu xəbər verir ki, sonuncu tapılan şəxsin azyaşlı olduğu bildirilir.

Beləliklə, hadisə nəticəsində ölənlərin ümumi sayı altıya çatıb. Həlak olanlardan üçü qadın, biri kişi, ikisi isə uşaqdır.

Qeyd edək ki, dağıntılar altında qalan yeddi nəfərdən yalnız üç yaşlı uşaq sağ xilas edilib. Hadisə zamanı xəsarət alan dörd nəfər xəstəxanaya yerləşdirilib. Onlardan birinin vəziyyəti ağırdır.

Axtarış-xilasetmə əməliyyatı başa çatıb.

19 noyabr, 21:53

Tbilisinin Poniçala qəsəbəsində yaşayış binasında baş verən partlayış nəticəsində ölənlərin sayı beşə çatıb, dağıntılar altında qaldığı ehtimal edilən daha bir nəfərin axtarışı davam etdirilir.

"Report"un Gürcüstan bürosu xəbər verir ki, xilasedicilər dağıntılar altından daha bir nəfərin meyitini çıxarıblar.

Hadisə nəticəsində xəsarət alan 5 nəfər xəstəxanaya yerləşdirilib. Xəstəxanaya yerləşdirilənlərdən 31 yaşlı kişinin vəziyyəti ağırdır. Onun bədəninin təxminən 87 faizi yanıb, tənəffüs yolları zədələnib.

Hazırda dağıntılar altında qalan sonuncu şəxsin axtarışı aparılır.

Gürcüstanın daxili işlər naziri Sulxan Tamazaşvilinin sözlərinə görə, hadisə beşinci mərtəbədəki mənzildə qazla işləyən qızdırıcı cihazdan istifadə zamanı baş verib.

Xatırladaq ki, Azərbaycan Tbilisidəki yaşayış binasında baş verən partlayışla bağlı Gürcüstana başsağlığı verib.

19 noyabr, 18:50

Tbilisinin Poniçala qəsəbəsində partlayışdan sonra yaşayış binasının dağıntıları altından daha bir nəfərin meyiti çıxarılıb.

"Report"un Gürcüstan bürosu xəbər verir ki, xilasedicilər hazırda dağıntılar altında qalan 3 nəfərin axtarışını davam etdirirlər.

İlkin məlumata görə, partlayışa binada təbii qazın yığılması səbəb olub.

19 noyabr, 18:36

Tbilisinin Poniçala qəsəbəsində partlayış nəticəsində uçmuş yaşayış binasının dağıntıları altından iki nəfərin meyiti çıxarılıb, ölənlərin qadın və uşaq olduğu bildirilir.

"Report"un Gürcüstan bürosu xəbər verir ki, xilasedicilər hazırda dağıntılar altında qalan daha 4 nəfərin axtarışını davam etdirirlər.

İlkin məlumata görə, partlayışa binada təbii qazın yığılması səbəb olub.

19 noyabr, 17:27

Tbilisinin Poniçala qəsəbəsində partlayış nəticəsində dağıntılar altında bir neçə saat qalan azyaşlı sağ çıxarılıb.

"Report"un Gürcüstan bürosu xəbər verir ki, xilasedicilər uşağı binanın pəncərəsindən çıxararaq xilas ediblər.

Onun sağ çıxarılması hadisə yerində alqışlarla qarşılanıb.

Hazırda dağıntılar altında qalan daha 6 nəfərin, o cümlədən iki uşağın axtarış-xilasetmə əməliyyatı davam etdirilir.

19 noyabr, 11:53

Tbilisinin Poniçala qəsəbəsində yaşayış binasında baş verən partlayışdan sonra xilasetmə işləri davam etdirilir.

"Report"un Gürcüstan bürosu xəbər verir ki, xilasedicilər binanın giriş hissəsini dağıntılardan təmizləyirlər.

Məlumata görə, dağıntılar altında insanların qalması ehtimal olunur.

Bir neçə dəqiqə əvvəl binanın çökmə təhlükəsi səbəbindən təmizləmə işləri müvəqqəti dayandırılıb.

Yerli sakinlər dağıntılar altında yeddi nəfərə qədər insanın, o cümlədən azyaşlı uşaqların qala biləcəyini bildiriblər. Onların sözlərinə görə, bina qəzalı vəziyyətdə olub.

Hadisə yerinə binada yaşayan şəxslərin yaxınları da gəlib.

Partlayışın təbii qazın yığılması nəticəsində baş verdiyi ehtimal olunur. Hadisənin dəqiq səbəbi hələlik rəsmən açıqlanmayıb.

Gürcüstanın səhiyyə naziri Mixeil Sarjveladzenin son məlumatına görə, hadisə nəticəsində dörd nəfər, o cümlədən bir azyaşlı müxtəlif dərəcəli xəsarətlərlə xəstəxanaya yerləşdirilib.

Hazırda ərazidə xilasetmə əməliyyatı davam etdirilir.

19 noyabr, 11:18

Tbilisinin Poniçala qəsəbəsində təbii qaz sızması nəticəsində yaşayış binasında partlayış baş verib.

"Report"un Gürcüstan bürosu xəbər verir ki, bu barədə ölkənin Daxili İşlər Nazirliyinin Fövqəladə Halların İdarə Edilməsi Xidməti məlumat yayıb.

Məlumata görə, hadisə nəticəsində dörd nəfər xəsarət alıb, biri azyaşlıdır. Yaralılar təcili tibbi yardım briqadası tərəfindən xəstəxanaya çatdırılıb. Onların hər üçünün huşunun yerində olduğu bildirilib.

Yanıq Mərkəzinin rəhbəri Quqa Kaşibadzenin sözlərinə görə, yaralılardan birinin vəziyyəti ağırdır. O, mərkəzin reanimasiya şöbəsində müalicə olunur.

Hadisə yerində yanğınsöndürmə və xilasetmə xidmətinin əməkdaşları çalışır. Xilasetmə əməliyyatı davam etdirilir.