Bakının "Şamaxinka" ərazisindəki yerüstü piyada keçidində uzun müddətdir davam edən ciddi problemlə üzləşən sakinlər narazılıqlarını ifadə edirlər. Keçidin liftinin aylardır işləməməsi və aidiyyəti qurumların bu məsələyə laqeyd yanaşması vətəndaşların gündəlik həyatını çətinləşdirir.
NOCOMMENT.az xəbər verir ki, Azərbaycan Avtoyolları Dövlət Agentliyinin (AAYDA) balansında olan və bir neçə aydır sıradan çıxan liftin təmiri istiqamətində heç bir tədbir görülmür. Qurumun öz vəzifə borcunu vaxtında icra etməməsi səbəbindən hər gün minlərlə piyada, xüsusilə də həssas qrup nümayəndələri ciddi əziyyət çəkirlər.
Liftin işləməməsi səbəbindən əlillər, uşaq arabası ilə hərəkət edən ailələr, yaşlılar və azyaşlılar körpüdən istifadə edərkən böyük çətinliklərlə qarşılaşırlar. Xüsusilə əlil arabasında olan şəxslərin bu maneəni aşması qeyri-mümkün vəziyyətə gəlib. Çəkisi 70-80 kq olan bir insanı körpə uşaq kimi qucağa alıb pilləkənlərlə daşımaq mümkün olmadığı üçün onlar həm də fiziki təhlükə ilə üzləşirlər.
Sakinlər bildirirlər ki, liftlər sadəcə dekorasiya üçün deyil, vətəndaşların rahatlığı və təhlükəsizliyi üçün quraşdırılıb. Lakin AAYDA-nın məsuliyyətsizliyi ucbatından sosialyönümlü bu infrastruktur işlək vəziyyətdə deyil.
Vətəndaşlar tələb edirlər ki, AAYDA dərhal hərəkətə keçsin, qurum öz birbaşa vəzifə borcunu yerinə yetirərək "Şamaxinka"dakı yerüstü keçidin liftini təmir etsin və işlək vəziyyətə gətirsin. Bu problem tez bir zamanda aradan qaldırılmalı, insanların hərəkət azadlığı təmin olunmalıdır.
Əli Səfərli,
