Son vaxtlar rus bölməsi və bu bölmədə təhsil alan şagirdlərlə bağlı fikirlər ictimai müzakirələrə səbəb olub.
Gununsesi.info xəbər verir ki, Milli Məclisin plenar iclasında 2027-ci ilin dövlət büdcəsinin müzakirəsi zamanı deputat Hikmət Babaoğlu Azərbaycanda 157 min şagirdin rus bölməsində təhsil aldığını və onların təhsil xərclərinin dövlət büdcəsi hesabına qarşılandığını bildirib.
Deputat vurğulayıb ki, milli kimlik və milli ideologiya təhsil prosesində formalaşır. Onun sözlərinə görə, hazırda Azərbaycanda 1 milyon 570 min şagird Azərbaycan, 157 min şagird isə rus bölməsində təhsil alır.
Məsələyə Kəlbəcər rayonu Ş. Şükürov adına 35 nömrəli tam orta məktəbin direktoru Elşən Əzim də münasibət bildirib.
O iddia edib ki, hər il rus bölmələrində təhsil üçün 314 milyon manat, məcburi köçkün məktəbləri üçün isə 188 milyon manat vəsait ayrılır:
“Məcburi köçkün məktəblərinin əsas vəzifələrindən biri doğma rayonların adət-ənənələrini, milli-mənəvi dəyərlərini və mədəni irsini qorumaq olub.
İşğal dövründə Kəlbəcər, Ağdam, Füzuli, Laçın, Qubadlı, Zəngilan və Şuşa məktəbləri həmin bölgələrdə doğulmamış uşaqların da öz rayonlarının tarixi, mədəniyyəti və ənənələri ilə böyüməsinə şərait yaradıb.
Bu məktəblər 30 il ərzində bölgələrin folklorunun, musiqisinin və milli-mənəvi dəyərlərinin qorunmasında mühüm rol oynayıb. Onun fikrincə, həmin məktəblərdə yetişən uşaqlar doğma torpaqlarına qayıdışa hazırlanıb”,-deyə o əlavə edib.
Elşən Əzim rus bölmələri ilə məcburi köçkün məktəblərinə ayrılan vəsait arasında fərq olduğunu vurğulayaraq, məktəblərin bağlanması və birləşdirilməsi məsələsinə münasibətdə fərqli yanaşmanın olduğunu bildirib.
O hesab edir ki, dövlət büdcəsinə qənaət məqsədilə məktəblərin bağlanması nəzərdə tutulursa, bu məsələyə rus bölmələrinin olduğu məktəblər də daxil olmaqla, bütün təhsil müəssisələri üzrə eyni meyarlarla baxılmalıdır.
Şəbnəm Rəhimova
The post Rus məktəblərinə ayrılan vəsait məcburi köçkün məktəblərindən çoxdur first appeared on Günün Səsi.