Qəzzada qış yağışlarının yaratdığı fəlakətli mənzərə və minlərlə çadırın su altında qalması bir daha nümayiş etdirir ki, beynəlxalq birlik bəşəri faciələrə qarşı yenə də ikili standartlar nümayiş etdirir. Köçkünlərin sığınacaqlarının, əşyalarının və yataq yerlərinin yararsız vəziyyətə düşməsi, uşaqların və mülki əhalinin şaxtalı və yağışlı havada açıq səma altında dözülməz şəraitdə qalması böyük bir humanitar faciədir.
Bu acı mənzərə Azərbaycan xalqına çox tanışdır, çünki xalqımız I Qarabağ müharibəsi dövründə 1 milyon məcburi köçkünün həyatı üzərindən məhz belə ağır və dözülməz acınacaqlı illəri yaşayıb, çadırlarda, vaqonlarda və ağır sosial şəraitdə ömür sürərək illərlə bu dərdi çəkib. Həmin vaxt BMT, ATƏT və digər nüfuzlu dünya təşkilatları erməni təcavüzü nəticəsində yurd-yuvasından didərgin düşən soydaşlarımızın üzləşdiyi bu fəlakətləri görməzdən gəlmiş, ikili standartların qurbanına çevrilən azərbaycanlıların haqq səsini eşitməmişdilər.
Məsələ ilə bağlı NOCOMMENT.az-a açıqlama verən politoloq, professor Qabil Hüseynli bildirib ki, dünya güclərinin və beynəlxalq təşkilatların humanitar böhranlara qarşı bu cür selektiv yanaşması ədalətsizliyin və qərəzliliyin bariz nümunəsidir:
"Təəssüflər olsun ki, beynəlxalq qurumlar geosiyasi maraqlara və ikili standartlara uyğun olaraq insan hüquqlarını və real faciələri görməzdən gəlirlər. Necə ki illər öncə Azərbaycan xalqı erməni təcavüzü nəticəsində yaranan 1 milyon qaçqın və məcburi köçkünün çəkdiyi dözülməz əziyyətlərlə təkbaşına baş-başa buraxılmışdı, bu gün də Qəzzada eyni ssenari təkrar olunur. Dünya ictimaiyyəti baş verən bu insanlıq dramına səssiz qalmaqla, sadəcə, humanitar böhranın dərinləşməsinə göz yumur və öz ədalətsiz mövqeyini bir daha nümayiş etdirir".
Sara,
NOCOMMENT.az
