Xroniki tənhalıq 65 yaşdan yuxarı insanlarda demensiya (yaddaş zəifliyi) riskini 38 faiz artırır.

“Qafqazinfo”nun xəbərinə görə, Fransanın Bordo Universitetinin alimləri tərəfindən aparılan 30 illik araşdırmanın nəticələri bunu deməyə əsas verir.

“Aging & Mental Health” jurnalında dərc olunan tədqiqat 1988-2018-ci illər ərzində 3777 nəfərin sağlamlıq göstəricilərinin izlənilməsi əsasında hazırlanıb.

Tədqiqat çərçivəsində iştirakçılar “heç vaxt tənha olmayanlar”, “vaxtaşırı tənhalıq yaşayanlar” və “xroniki tənhalıq yaşayanlar” olmaqla üç qrupa bölünüb. Nəticələr göstərib ki, xroniki tənhalıq qrupuna daxil olan şəxslərin 49 faizində demensiya inkişaf edib. Bu göstərici vaxtaşırı tənhalıq yaşayanlarda 34 faiz, heç vaxt tənha olmayanlarda isə 33 faiz təşkil edib. Statistik təhlillər müvəqqəti tənhalığın demensiya riskinə ciddi təsir etmədiyini, lakin davamlı tənhalığın bu riski 38 faiz yüksəltdiyini ortaya qoyub.

Bordo İctimai Səhiyyə Mərkəzinin baş tədqiqatçısı Karine Peres bildirib ki, həyatın müəyyən dövrlərində tənhalıq hiss etmək təbiidir, lakin təhlükəli olan bu halın xroniki xarakter almasıdır.

Onun sözlərinə görə, uzunmüddətli tənhalıq xroniki stressə səbəb olur və immun sistemini zəiflədərək orqanizmdə iltihabi prosesləri gücləndirir. Bundan əlavə, tənhalıq fiziki aktivliyin azalması və qeyri-sağlam qidalanma ilə müşayiət olunur ki, bu da demensiyaya yol açan ürək-damar xəstəlikləri və diabet riskini artırır.

Araşdırmanın aparıcı müəllifi İvanna Simon isə vurğulayıb ki, səhiyyə və sosial xidmət mütəxəssisləri tənhalıq riskini qiymətləndirərkən təkcə insanın kiminləsə birgə yaşayıb-yaşamamasına deyil, onun özünü nə dərəcədə tənha hiss etməsinə və sosial əlaqə qurma bacarığına da diqqət yetirməlidirlər.