Naxçıvan Şəhər İcra Hakimiyyətinin əməkdaşı ilə bağlı qadın vətəndaşın şikayəti əsasında araşdırma aparılıb.

NOCOMMENT.az ANZ.AZ-a istinadən xəbər verir ki, redaksiyaya daxil olan məlumata görə, Naxçıvan Şəhər İcra Hakimiyyətinin əməkdaşı Emin Zakirov (ad şərtidir) şəhər icra hakimiyyəti başçısının vətəndaş qəbulu zamanı müraciət edən qadının telefon nömrəsini əldə edərək sonradan ona qeyri-etik məzmunlu mesajlar göndərib və uyğunsuz təkliflər edib.
Redaksiyaya daxil olan məlumatda həmin əməkdaşın baş verən hadisə ilə əlaqədar işdən azad edildiyi də bildirilirdi.

Məsələyə aydınlıq gətirmək məqsədilə ANZ.AZ Naxçıvan Şəhər İcra Hakimiyyətinə rəsmi informasiya sorğusu ünvanlayıb.

İcra Hakimiyyətindən sorğumuza verilən cavabda vətəndaş müraciəti əsasında araşdırma aparıldığı və qanunvericiliyə uyğun tədbir görüldüyü təsdiqlənib.

Rəsmi cavabda bildirilir:

“Qeyd olunan məsələ ilə bağlı daxil olmuş vətəndaş müraciətinə aidiyyəti üzrə baxılaraq göstərilən məsələnin aydınlaşdırılması məqsədilə müvafiq qaydada araşdırma aparılmış və qanunvericiliyin tələblərinə uyğun tədbir görülmüşdür”.