Azərbaycan Prezidenti İlham Əliyev noyabrın 19-da imzaladığı sərəncamla Məleykə Abbaszadəni Dövlət İmtahan Mərkəzinin İdarə Heyətinin sədri vəzifəsindən azad edib.

Digər sərəncamla o, Bakı Dövlət Universitetinin rektoru təyin olunub.

73 yaşlı Məleykə Abbaszadə Azərbaycanda ali məktəblərə qəbul sisteminin simalarından biri sayılır.

O, 1994-cü ildən Tələbə Qəbulu üzrə Dövlət Komissiyası (TQDK) sədrinin birinci müavini, 2000-ci ildən isə qurumun rəhbəri olub.

TQDK 2016-cı ildə Dövlət İmtahan Mərkəzinə çevriləndən sonra da quruma rəhbərlik etməyə davam edib.

Məleykə Abbaszadənin rəhbərlik etdiyi dövrdə qəbul imtahanlarının təşkili Azərbaycanda ən çox etibar edilən dövlət mexanizmlərindən biri kimi təqdim olunur.

1990-cı illərin əvvəllərində tətbiq edilən test üsulu və sonrakı illərdə formalaşdırılan mərkəzləşdirilmiş qəbul sisteminin təhsil sahəsində rüşvət və qeyri-rəsmi müdaxilə imkanlarını əhəmiyyətli dərəcədə məhdudlaşdırdığı müşahidə olunub.

Bir çox təhsil eksperti məhz bu sistemin ali məktəblərə qəbul prosesində şəffaflığın təmin olunmasına kömək etdiyini bildirir.

İllər ərzində qəbul imtahanlarının nəticələrinin elektron qaydada açıqlanması, cavab kartlarının yoxlanılması mexanizmləri və apellyasiya prosedurları da DİM-in fəaliyyətinin müsbət tərəfləri kimi qiymətləndirilib.

Bununla yanaşı, DİM və onun rəhbərliyi tez-tez tənqidlərlə də üzləşib.

Hər il imtahan sessiyalarından sonra bəzi abituriyentlər, valideynlər və müəllimlər sualların həddindən artıq çətin olduğunu, məktəb proqramından kənara çıxdığını və ya dərsliklərin məzmunu ilə tam üst-üstə düşmədiyini iddia ediblər.

Xüsusilə son illərdə açıq tipli və məntiq yönümlü suallar ətrafında müzakirələr aparılıb. Tənqidçilər məktəblərdə tədris olunan proqramla imtahan tələbləri arasında fərqlərin olduğunu desələr də, DİM rəhbərliyi dəfələrlə sualların təsdiq edilmiş kurikuluma uyğun hazırlandığını və onların şagirdlərin bilik və bacarıqlarını ölçməyə yönəldiyini bildirib.

© 2026 BBC. BBC kənar saytların məzmununa məsul deyil. Bizim kənar keçidlərə dair yanaşmamız barədə oxuyun.