İspaniyanın Kataloniya bölgəsindəki “Cova de la Font Major” mağarasında onilliklər boyu turistlərin diqqətindən yayınan 280 Paleolit dövrü qayaüstü oyması aşkar edilib.
“Qafqazinfo” xəbər verir ki, Katalan İnsan Paleoekologiyası və Sosial Təkamül İnstitutunun alimləri Xosep Mariya Verjes və Miriam Salas-Altes tərəfindən sənədləşdirilən bu tapıntı Aralıq dənizi İberiyasında qeydə alınan üçüncü ən böyük Buz dövrü mağara sənəti kolleksiyasıdır.
1957-ci ildə mağaranın girişi açıldıqdan bəri minlərlə ziyarətçi divarlardakı qədim cizgilərin yanından fərqinə varmadan keçib, hətta bəziləri tarixi oymaların üzərinə öz adlarını və tarixləri həkk ediblər.
Divarlarda at, maral, keçi, vəhşi öküz və ayı təsvirlərindən ibarət 55 heyvan fiquru ilə yanaşı, hasara bənzər paralel xətlər və yazını xatırladan mücərrəd simvollar yer alır. Alimlər bu qədər kiçik ərazidə bu cür sıx təsvirlərin olmasını nadir hadisə kimi qiymətləndirirlər.
Arxeoloji dəlillər mağaradan Paleolit, Neolit və Tunc dövrlərində yaşayış və dəfn yeri kimi istifadə edildiyini göstərir. Tədqiqatçılar təsvirlərin dəqiq yaşını uran analizi vasitəsilə müəyyənləşdirməyi planlaşdırırlar.
Nüfuzlu “Antiquity” jurnalında dərc olunan araşdırmadan sonra qədim irsin müasir müdaxilələrdən qorunması məqsədilə mağaranın oymalar yerləşən bölməsi ziyarətçilərin girişi üçün bağlanıb.
