Rusiya xarici işlər naziri Sergey Lavrov Ermənistanın Kollektiv Təhlükəsizlik Müqaviləsi Təşkilatına (KTMT) üzvlük haqqını iki ildən artıqdır ödəmədiyini və buna görə İrəvana qarşı tədbirlərin görülə biləcəyini açıqlayıb.
Gununesi.info xəbər verir ki, Lavrovun sözlərinə görə, KTMT Nizamnaməsinin 25-ci maddəsinə əsasən, üzvlük haqqını iki il ərzində ödəməyən ölkənin təşkilatda səsvermə hüququ dayandırıla bilər. Bununla bağlı qərar layihəsinin üzv dövlətlərin liderlərinin müzakirəsinə çıxarılması nəzərdə tutulur.
Qeyd edək ki, Ermənistan 1992-ci ildən Kollektiv Təhlükəsizlik Müqaviləsinin iştirakçısıdır. KTMT isə 2002-ci ildə yaradılıb.
Baş nazir Nikol Paşinyanın hakimiyyəti dövründə Ermənistanın təşkilatla münasibətləri xeyli pisləşib. İrəvan KTMT-ni Azərbaycanın 2022-ci ildəki hərbi əməliyyatları zamanı Ermənistanın təhlükəsizliyini təmin etmək üçün lazımi addımlar atmamaqda ittiham edib.
Paşinyan 2024-cü ilin fevralında Ermənistanın KTMT-də iştirakını dondurduğunu bəyan edib. Buna baxmayaraq, ölkə təşkilatdan rəsmən çıxmayıb.
Xatırladaq ki, üzvlük haqqının ödənilməməsinə görə səsvermə hüququnun dayandırılması Nizamnamədə nəzərdə tutulsa da, təşkilatdan xaric edilmə avtomatik baş vermir və ayrıca qərar tələb edir.
Firuzə Mahmudova
Gununesi.info
The post Lavrov: first appeared on Günün Səsi.
