Türkiyənin məşhur “Kurtlar Vadisi” serialının tanınmış aktyorları illər sonra “Cerrahpaşalılar” adlı bədii filmdə bir araya gəliblər.
NOCOMMENT.az xəbər verir ki, filmdə İstanbulun köklü kabadayı ailələri ilə yeni nəsil mafiya arasında hakimiyyət uğrunda mübarizə təsvir olunur.
Süjetin mərkəzində İstanbulun köhnə yeraltı dünyasının nüfuzlu simalarından ibarət “Böyük Masa” dayanır.
Filmin prodüseri və rejissoru Burak Can Çelik, kastinq direktoru isə Çağdaş Başarandır.
“Böyük Masa” adlı heyətdə Attila Olgaç, Ümit Acar, Levent Çakır və Melih Çardak kimi təcrübəli aktyorlar yer alıblar.
Yeni nəsil mafiyanı təmsil edən Savaş obrazını isə Erdem Kaynarca canlandırır. Onun köhnə kriminal düzəni dəyişmək istəyi İstanbulun yeraltı dünyasında böyük qarşıdurmaya səbəb olur.
Filmin çəkilişlərinin artıq yekunlaşmaq üzrə olduğu bildirilir.
