Respublikanın bir çox regionlarında olduğu kimi, Sumqayıtda da qeydə alınan sərt hava şəraiti və güclü külək yerli kommunal təsərrüfatın əsl "çılpaqlığını" bir daha üzə çıxarıb.
Şəhərin Yaşıldərə yaşayış massivində əsən nisbətən şiddətli külək dözümsüz elektrik dirəyini aşıraraq bütün ərazini qaranlığa qərq edib. Hər il eyni mənzərənin təkrarlanması, infrastrukturun bərbad vəziyyətdə olması və aidiyyəti qurumların profilaktik tədbirlər görmək əvəzinə yalnız fəsad baş verəndən sonra "hərəkətə keçməsi" sakinlərin səbrini daşırıb.
NOCOMMENT.az xəbər verir ki, qəza nəticəsində yaşayış massivinin elektrik enerjisi təchizatı tamamilə dayanıb, sakinlər çətin vəziyyətdə qalıblar.
İllərdir köhnəlmiş, heç bir normativə cavab verməyən dirəklərin yenilənməsi üçün hələ hansı təbii fəlakətin baş verməli olduğunu soruşan sakinlər haqlı olaraq məsul qurumların səhlənkarlığından gileylənirlər.
Qəza baş verən kimi ənənəvi olaraq "gücləndirilmiş iş rejimi" şüarları ilə əraziyə bir neçə fəhlə çıxaran qurumlar əslində mövcud problemləri kökündən həll etmək əvəzinə, yalnız göz boyamaqla məşğuldurlar.
Nəticədə isə hər küləkli havada əziyyət çəkən yenə də hər dəfə sadə vətəndaş olur.
Əli Səfərli,
NOCOMMENT.az
