“Bir tərəfdən deyirlər ki, Kəramət hökumətin adamıdır. O biri tərəfdən də deyirlər ki, Kəraməti niyə tutmurlar? Hökumətin adamıyamsa, məni niyə tutmalıdırlar?”.
Gununsesi.info bildirir ki, bunu yazıçı Kəramət Böyükçöl deyib:
“Mədəniyyət Nazirliyinin 50 yazıçı arasında keçirdiyi səsvermədə 1-ci yerə çıxıram. Bir tərəfdəkilər deyir ki, Kəramət dövlətin düşmənidir, nazirlik niyə ona qalib olmağa imkan verir? O biri tərəfdəkilər də deyir ki, Kəramət dövlətin adamıdır, yoxsa niyə qoyurlar Akademiyanın qabağında kitab satsın?
Çox maraqlıdır, mən sizin nəyinizəm? Müxalifət lideriyəm, partiya sədriyəm, millət vəkiliyəm, nəyəm, kiməm ki, mənim üzərimə bu qədər öhdəlik qoyursunuz və mənim haqqımda cəmiyyətdə bu qədər müzakirələr gedir? Xaricdəkilər, daxildəkilər, sağdakılar, soldakılar, yaltaqlar, yalaqlar, dələduzlar — hərə bir tərəfdən hücum çəkir.
Biri deyir, Kəramət satılıb. Qardaş, kimə satılmışam? Kimə satılmışamsa, onun varyoxunu… Elə şər atanın da!
Nəyi satmışam, kimi satmışam?
O biri deyir ki, bəs məni niyə qoymurlar Akademiyanın qabağında nəsə satım? Akademiyanın qabağında düz 5 aydır ki, bir dönər yeri boşdur, üstünə də yazılıb ki, icarəyə verilir. Get götür, dönər sat. Akademiyanın qabağında o qədər şeylər satırlar, sən də onların biri. Mən Azərbaycan vətəndaşı deyiləm? Öz ölkəmdə kitabımı sata bilmərəm? Minlərlə adam küçədə nəsə satır. Birini satmağa qoymurlarsa, onu niyə mənlə müqayisə edirsən? Get satanları müqayisə elə də.
Başqa biri yenə deyir ki, mən bura avtobus qoysam, icazə verməzlər. Deyirəm, get Kəramət ol, sənə də icazə verəcəklər. Deyir, Kəramət olmaq nədir ki? Deyirəm, mənim avtobusumu burdan götürsələr, bütün ölkə biləcək. Amma sənin avtobusunu götürsələr, heç kim bilməyəcək. Kəramət olmaq budur.
Bir başqası yazır ki, Kəramət uşağına aliment vermir. Dostlarım da dirənib ki, niyə ona cavab vermirsən?
Deyirəm, nə cavab verim? Deyəcəyəm ki, ayda uşaqlara bu qədər pul verirəm. İndi də deyəcək ki, pulu hardan alırsan?
Hələ bilmirəm e, ona cavab ver deyib üstümə dirənən adam həqiqətən dostdur, yoxsa məni güllənin qabağına itələyir.
Gör nə qədər əxlaqsız və mənəviyyatsız bir mühitdə yaşayırıq ki, bütün ölkə, hökumətli-müxalifətli, yığışıb mənim boynuma qoymaq istəyir ki, sənə obyekt veriblər.
Deyirəm, yalandır.
O yer obyekt deyil. Cücə damıdır. Minlərlə Azərbaycan vətəndaşı kimi mən də gedib öz yerimə sənəd almışam.
Deyir, yox e, sənə obyekt hədiyyə ediblər.
Deyirəm, o obyekti mənə hədiyyə verənin varyoxunu… Şər atanın da!
İndi də deyir, niyə söyüş söyürsən?
O şər, o böhtanlar sənin öz haqqında deyilməyənə qədər adam elə bilir düz danışırlar.
Hal-hazırda isə mənim hansısa fikrimlə, mövqeyimlə yox, konkret olaraq mövcudluğumla mübarizə aparırlar. Yəni bunların fikrinə görə mənə nə səhv danışmaq olar, nə də düz. Deyirlər, sən ümumiyyətlə niyə varsan?
Niyə belə edirlər, onun səbəbini bir az düşüncəsi olan adam yaxşı bilir.
Hələ biri də yazıb ki, Kera, sən də satıldın.
Deyirəm, nə bilirsən?
Qayıdasan ki, nə bilim. Gördüm, qəşəngləşmisən. Dedim, yəqin satılmısan.
Mən bu şeylərə çox öyrəşmişəm. Savalan babadan üzü bəri gör neçə illərin Kəramətiyəm. Sözümü deməyə cəsarətim də var, özümü qorumağa ağlım da. Mənim haqqımda deyilən şər və böhtanlar isə bir müddət sonra yoxa çıxıb gedir. Amma əmin olun ki, bu yalanlarla bəslənən və onlara inanan cəmiyyət heç vaxt ağ günə çıxmayacaq”,- deyə o, həmçinin qeyd edib.
The post Kəramət Böyükçöl ittihamlara cavab verdi first appeared on Günün Səsi.
