Fransanın paytaxtı Parisin ən dəbdəbəli ərazilərindən birində silahlı soyğunçuluq baş verib.
“Qafqazinfo” xəbər verir ki, saat 11:00 radələrində Vendom meydanı yaxınlığındakı Rue de la Paix küçəsində yerləşən “De Beers” lüks zərgərlik mağazası dörd nəfərlik silahlı qrupun hədəfinə çevrilib.
Qara geyimli və maskalı hücumçular mağazanın qarşısına iki motosikletlə gəliblər. Qrupun bir üzvü “Kalaşnikov” tipli avtomatik silahla çöldə keşik çəkərkən, digər şübhəlilər motosikletlərdən biri ilə mağazaya zorla daxil olublar. İşçilərin qorxudan yuxarı mərtəbəyə qaçdığı vaxt hücumçular vitrinlərdən qiymətli zinət əşyalarını toplayıblar. Cəmi 2-3 dəqiqə davam edən soyğundan sonra şübhəlilər motosikletlərlə hadisə yerindən uzaqlaşıblar. Polis mənbələrinin ilkin qiymətləndirməsinə görə, oğurlanan brilyant və zərgərlik əşyalarının dəyəri 1 milyon avrodan çoxdur.
Paris Dövlət Prokurorluğu mütəşəkkil cinayətkarlıq çərçivəsində istintaqa başlayıb və araşdırma Paris Məhkəmə Polisinin Mütəşəkkil Cinayətkarlıqla Mübarizə Bölməsinə tapşırılıb. Mağaza istintaq bitənədək bağlanıb, təhlükəsizlik qüvvələri isə qaçan dörd şübhəlinin tutulması üçün genişmiqyaslı əməliyyat aparır.
Qeyd edək ki, əvvəllər həmin küçədə yerləşən “Bulgari”, “Piaget” və “Harry Winston” kimi brendlərin mağazaları da silahlı soyğunçuların hədəfinə çevrilmişdi. Ötən il Luvr Muzeyində baş verən və 88 milyon avro dəyərində zərgərlik məmulatlarının oğurlanması ilə nəticələnən hadisə də Parisdə təhlükəsizliklə bağlı narahatlıqları artırmışdı.
