“Şərurlu İsfəndiyar” kimi tanınan tikinti maqnatı, “Şərur” MTK-nın rəhbəri İsfəndiyar Axundovun Azərbaycan Memarlıq və İnşaat Universitetinin tələbələri ilə görüşməsinə ictimai reaksiya xeyli başadüşüləndir. Əksəriyyət İsfəndiyar Axundovun tələbələrə nə öyrətdiyi və yaxud nə öyrədə biləcəyi ilə maraqlanır.

Çünki bu tikinti maqnatı adını belə yaza bilməyən, hərfləri tanımayan savadsız olduğunu hələ ötən il ictimai şəkildə elan etmişdi. İntellekti, savadı ilə deyil, “vəhşi kapitalizm”in nəticəsində “cənnətə düşən” İsfəndiyar Axundov gənclər, xüsusilə tələbələr üçün olduqca pis nümunədir - həm iş karyerası, həm də şəxsi həyatı baxımından. Onun iş karyerası oğurluq, talan üzərində qurulub: əvvəlcə heyvan oğurluğu, sonra isə Ermənistana gedən qatarların talanması... Öz etirafına görə, birdəfəyə 30 vaqon mal oğurlayıb.

Adam bu cür sərvət qazanıb, daha sonra isə yığdıqlarını tikinti biznesinə yatırıb, özü deyir ki, “alimləri əlinin altında işlədən çoban”dır.

Şəxsi həyatı ilə bağlı “təcrübəsi” də budur: restoranda “iki kişi, iki qadın” yeyib-içərkən başqa masada oturan ailə görür, o ailədə bir xanımı bəyənir, dərhal ailəyə müdaxilə edir və onların istirahətini zəhərə döndərir, nəhayətdə həmin xanımı özünə ikinci arvad edir...

“Şərur” MTK hansı uğurunu, arxitektur-memarlıq və yaxud şəhərsalma sahəsində təcrübəsini Memarlıq və İnşaat Universitetinin tələbələrinə öyrədə bilər? Kiçik torpaq sahəsində bir-birinin içində, nəfəs almağa həyəti, maşın saxlamağa qarajı olmayan, kanalizasiya xəttini yükləyən göydələnlər ucaltmaqla Bakının şəhərsalma mədəniyyətinin anasını necə ağlatmasınımı gənclərə izah edəcək?

“Şərur” MTK bütün sərvətini Azərbaycanda və azərbaycanlılardan qazanıb. Bu şirkətin, məsələn, çox yaxşı oxuyan tələbələrin xaricdə təhsil haqqını ödədiyi, tələbə təqaüdü təsis etdiyi, Azərbaycanı təbliğ edən bir filmə sponsorluq etdiyi, Azərbaycan tarixi üçün mühüm araşdırmanı maliyələşdirdiyi, Azərbaycana aid qədim əlyazmanın ölkəmizə alınıb gətirilməsində rol oynadığı və s. aksiyalar keçirdiyini eşidən olub?

Amma var-dövlətini Rusiyada qazanan və hazırda Bakı türməsində olan separatçı Ruben Vardanyanın olmayan erməni irsinin təbliği üçün milyardlarla vəsait xərclədiyi hər kəs eşidib-bilir. Vardanyan Bakı türməsindədir, ancaq təsis etdiyi fond hələ də ermənilər üçün milli layihələrə onmilyonlarla dollar ayırmaqdadır.

Əlavə edək ki, Vardanyan orta məktəbi qızılla, Moskvada universiteti fərqlənmə ilə - qırmızı diplomla bitirib.

Niyə erməni tələbə üçün nümunə Vardanyan, azərbaycanlı uşaqlar üçün Şərurlu İsfəndiyar olmalıdır?

AzMİU açıqlama verir ki:

- görüş tələbələrin təşəbbüsü ilə, dərsdənkənar vaxtda keçirilib, görüşün təşəbbüskarı qrupdakı tələbələrdən biri olub;

- mediada yayılan məlumatlardan sonra daxili araşdırma aparılıb. Müəyyən edilib ki, görüş universitetin ərazisində, auditoriyalarında və ya akt zallarında keçirilməyib;

- İsfəndiyar Axundovun tikinti şirkətinin rəhbəri olduğu əsas gətirilərək, tələbələrin onunla görüşmək istəyi başadüşüləndir.

AzMİU bəzi məsələləri “unudub”: İsfəndiyar Axundovla görüşdə yalnız tələbələr yox, həm də Meliorasiya və Su Təsərrüfatı Tikintisi kafedrasının müdiri, professor Zakir Musayev, dosent Mansur Zərbəliyev və assistent Rahilə Mehtiyeva iştirak ediblər.

Hər şeyi tələbələrin üstünə atmaq asandır. Ancaq AzMİU müəllimlərinin orda peyda olmasına nə deyir?

Digər tərəfdən, görüşlə bağlı məlumat saat 14:00 radələrində yayılıb, bu isə görüşün dərs saatına təsadüf etməsi ehtimalını artırır. Müəllimlərin iştirakı və dərs saatında görüşün keçirilməsi isə “dərsdən sonra özfəaliyyət” yox, planlaşdırılmış “tədris görüşü” ehtimalı yaradır.

Və nəhayət, AzMİU-nun tələbələrinin İsfəndiyar Axundovla görüş istəyini “başadüşülən” adlandırmasının özü başadüşülməzdir.

Deyəsən, AzMİU-ya hələ də aydın deyil ki, ictimaiyyət gələcək memar və inşaatçıların peşəkarla görüşməsini arzulayır, savadsız, hərf tanımayan, gəncliyində oğurluqla məşğul olan şəxslə yox.


Şeyx Teymur,
Axar.az