Ermənistan parlamentinin TRIPP layihəsini təsdiqləməsi İranda narahatlıq doğurub.
NOCOMMENT.az “Iran International” nəşrinə istinadən xəbər verir ki, İran rəsmiləri və dövlət mediası layihənin həyata keçirilməsinin ABŞ-nin İran sərhədləri yaxınlığında mövcudluğunun artmasına səbəb olacağı barədə xəbərdarlıq edirlər.
Qeyd edək ki, Ermənistan parlamenti sazişi oktyabrın 28-də təsdiqləyib. Bundan sonra İranın ali rəhbərinin müşaviri İrəvana qarşı təhdid xarakterli bəyanatla çıxış edib, dövlət mediası isə Tehranın layihənin həyata keçirilməsinin qarşısını almalı olduğunu bildirib.
İran rəsmiləri və analitikləri hesab edirlər ki, TRIPP layihəsi İranın tranzit gəlirlərinin azalmasına və regional nəqliyyat qovşağı kimi mövqeyinin zəifləməsinə səbəb ola bilər. Bundan əlavə, onlar İranın şimal sərhədləri yaxınlığında ABŞ-nin mövcudluğunun yaranmasını ciddi təhlükəsizlik təhdidi kimi qiymətləndirirlər.
Milli Məclisin deputatı Hikmət Babaoğlu Musavat.com-a açıqlamasında bildirib ki, TRIPP marşrutu sülh marşrutudur.
Onun sözlərinə görə, TRIPP fəlsəfə etibarilə tərəfdaşlığı, əməkdaşlığı həyata keçirmək üçün inşa edilən marşrutdur:
“Digər tərəfdən TRIPP iqtisadi marşrutdur, yəni yol, nəqliyyat, kommunikasiya, enerji dəhlizləri marşrutudur. Burada hər hansı bir ölkənin təhlükəsizliyini təhdid edəcək hərbi elementlər yoxdur. Ermənistan və ABŞ arasında əldə olunmuş razılaşmaya əsasən, marşrutun təhlükəsizliyini Ermənistanın müvafiq qurumları həyata keçirəcək. Belə olan halda, İranın TRIPP marşrutunu təhlükə və təhdid kimi qəbul etməsi, iqtisadi, logistika və kommunikasiya marşrutunu az qala ABŞ-nin hərbi bazası kimi təqdim etməsi fobiyadır”.
Hikmət Babaoğlu hesab edir ki, İran bu marşrutu öz imperialist maraqlarına təhdid kimi görür:
“İran hesab edir ki, regionda bütün ölkələr İrandan asılı olmalıdırlar, onun təzyiqini hiss etməlidirlər və İran burada bir imperialist hegemoniya qurmalıdır. Əsl təhlükə budur. Çünki bir neçə gün bundan əvvəl İran ali dini liderinin beynəlxalq məsələlər üzrə müşaviri Əli Əkbər Vilayəti dedi ki, 1828-ci il sənədlərinə görə Cənubi Qafqaz bizim nüfuz dairəmizdir. Milli dövlət nüfuz dairəsindən danışmır. Milli dövlət iqtisadi əməkdaşlıqdan danışır. Nüfuz dairəsindən danışanlar imperialist güclərdir, imperialist mərkəzlərdir. Demək ki, bu, İranın özünə təhdid hesab etdiyi marşrut əslində İranın qonşu ölkələrə qarşı təhdidi hesab edilməlidir”.\\musavat.com