Dünyanın ən böyük süni intellekt çipləri istehsalçısı “Nvidia”nın İdarə Heyəti şirkətin qurucusu və baş direktoru Jensen Huanqı vəzifəsindən kənarlaşdırmaq məsələsini müzakirə etmək üçün fövqəladə iclasa toplaşır.
“Qafqazinfo” xəbər verir ki, “Reuters” və “The Wall Street Journal” nəşrlərinin mənbələrə istinadən yaydığı məlumata görə, 63 yaşlı rəhbərin iki ayrı nikahdankənar münasibətinin üzə çıxması şirkəti dərin idarəetmə böhranı ilə üz-üzə qoyub.
Qalmaqal əvvəlcə Huanqın ABŞ kəşfiyyatı tərəfindən Çinə çip ötürülməsində və casusluqda şübhəli bilinən Alis Huanqla münasibətinin ifşa olunması ilə başlayıb. Bazar günü işçilərə göndərdiyi məktubda həyat yoldaşına xəyanət etdiyini etiraf edən baş direktor “tam məsuliyyəti” öz üzərinə götürsə də, təfərrüatı açıqlamayıb.
Lakin “The New York Times” qəzetinin Huanqın öz tabeliyində çalışan digər bir şirkət rəhbəri ilə də gizli münasibətdə olduğunu yazması vəziyyəti daha da gərginləşdirib.
İdarə Heyətinin Huanqı işdən çıxarmağa hazırlaşdığına dair xəbərlərdən sonra birjaların bağlanışından sonrakı ticarətdə “Nvidia” səhmləri təxminən 8-9 faiz ucuzlaşıb. Ümumilikdə, daxili araşdırma elan edildiyi gündən bəri texnologiya nəhəngi bazar dəyərində təxminən 600 milyard dollar itirib. Şirkət səhmlərinin təxminən 3,6 faizinə sahib olan Huanqın varisinin olmaması isə “Nvidia”nın gələcəyi ilə bağlı qeyri-müəyyənliyi artırır.
Qalmaqal Vaşinqtonda da ciddi siyasi əks-səda doğurub. “The Wall Street Journal”ın məlumatına görə, Demokrat senatorlar Elizabet Uorren və Kris Kuns ticarət katibi Hovard Lutnik, Dövlət katibi Marko Rubio və Ağ Evin aparat rəhbəri Stiven Millerə məktub göndərərək Çinə çip ixracı və Huanqın iddia edilən casusluq əlaqələrinə dair bütün sənədlərin qorunmasını tələb ediblər.
Eyni zamanda, Nümayəndələr Palatasının Çin Kommunist Partiyası üzrə Xüsusi Komitəsinin sədri Con Mulenar “Fox Business”ə açıqlamasında bildirib ki, əgər Huanq Konqres komitələri ilə qapalı brifinq keçirmək tələbinə cavab verməsə, ona rəsmi çağırış vərəqəsi göndəriləcək. Xarici İşlər və Kəşfiyyat komitələrinin rəhbərləri ilə birlikdə Huanqa müraciət edən Mulenar Pekinin “imtiyazlı məlumatlara” çıxış əldə edib-etmədiyini və bunun ABŞ-nin milli təhlükəsizliyinə təsirini araşdıracaqlarını vurğulayıb.
