Dünya və Avropa çempionu Fuad Zeynalov Şimali Makedoniyanın Skopye şəhərində keçirilən kikboksinq üzrə Avropa çempionatında Masterlər kateqoriyasında, 94 kq çəki dərəcəsində çıxış edib.
“Qafqazinfo” xəbər verir ki, o, yarışda finala vəsiqə qazanıb.
Finalda isə israilli rəqibinə aldığı xəbərdarlıqla məğlub olan F.Zeynalov gümüş medalla kifayətlənib.
İdmançı özü də bu barədə sosial şəbəkədə paylaşım edib və o, hədəfinin çempionluq olduğunu bildirib: “Əlbəttə, hədəfim çempionluq idi. Lakin bu nəticənin arxasında aylarla davam edən zəhmət, intizam, iradə və böyük əzm dayanır. Bu təcrübə mənim üçün növbəti hədəflərə aparan daha bir mühüm mərhələdir.
Bu yolda mənə inanan, dəstək olan və hər zaman yanımda olan hər kəsə dərin təşəkkürümü bildirirəm”.
Qeyd edək ki, master yarışlarında ağır çəkidə indiyə qədər heç bir idmançımız medal qazana bilməyib.
