“Mənzil hüququ yalnız vətəndaşın mənzil əldə etməsi demək deyil. Bu hüquq həm də şəxsin mülkiyyətinin qorunmasını, mənzilindən maneəsiz istifadə etməsini və təhlükəsiz yaşayış şəraitinə malik olmasını əhatə edir”.

Bu fikirləri Gununsesi.info-ya açıqlamasında əmlak məsələləri üzrə ekspert Fərid Cəfərli deyib:

“Azərbaycan Respublikası Konstitusiyasının 43-cü maddəsinə əsasən, heç kəs yaşadığı mənzildən qanunsuz məhrum edilə bilməz. Konstitusiya Məhkəməsi də öz hüquqi mövqeyində mənzil hüququnu şəxsin yaşayış sahəsinə malik olması və ondan maneəsiz istifadə edə bilməsi ilə əlaqələndirir.

Mənzil-tikinti kooperativlərinin (MTK) fəaliyyəti Azərbaycan Respublikasının Mənzil Məcəlləsinin 109–118-ci maddələri ilə tənzimlənir. Buna görə də MTK-lar öz kommersiya maraqları ilə yanaşı, qanunvericilikdə nəzərdə tutulan öhdəliklərə də əməl etməlidirlər.

Bu sahədə əsas problemlərdən biri tikinti müddətlərinin pozulmasıdır. Vətəndaşlar bəzən illərlə topladıqları vəsaiti mənzil almaq üçün MTK-ya ödəyirlər. Lakin tikintinin gecikdirilməsi, mənzilin təhvil verilmə tarixinin dəqiq bilinməməsi və müraciətlərə aydın cavab verilməməsi onların həm maddi vəziyyətinə, həm də hüquqlarına mənfi təsir göstərir.

Digər problem maliyyə şəffaflığı ilə bağlıdır. Bəzi hallarda vətəndaşlardan əvvəlcədən razılaşdırılmış məbləğdən əlavə pul tələb olunur. Bu ödənişlərin hansı əsasla istənildiyi aydın göstərilmədikdə, vətəndaşla MTK arasında mübahisələr yaranır.

Daha bir ciddi məsələ mənzil üzərində mülkiyyət hüququnun rəsmiləşdirilməsidir. Vətəndaş mənzilin pulunu tam ödədikdən sonra mülkiyyət hüququnun dövlət qeydiyyatına alınması üçün lazım olan sənədləri əldə edə bilmirsə, həmin mənzildən hüquqi baxımdan tam istifadə etməsi çətinləşir. Bu zaman MTK-nın müqavilə öhdəlikləri, tikintinin hüquqi vəziyyəti və mənzilin dövlət qeydiyyatına alınması məsələləri araşdırılmalıdır.

Vətəndaşların hüquqi məlumatlılığı da diqqət tələb edən məsələlərdəndir. Bəzi insanlar MTK ilə müqavilə bağlayarkən onun hüquqi nəticələrini, ödədikləri pulun mahiyyətini, mənzilin nə vaxt təhvil veriləcəyini və mülkiyyət hüququnun necə rəsmiləşdiriləcəyini tam bilmirlər. Bu da MTK ilə vətəndaş arasında münasibətlərdə tərəflərin imkanları baxımından fərq yaradır”.

 

 

Şəbnəm

Gununesi.info

The post Ekspert MTK-larla bağlı əsas problemləri açıqladı first appeared on Günün Səsi.