Şəmkir rayonunda dörd kəndi birləşdirən avtomobil yolu yenidən qurulsa da, sakinlərin sevinci yarımçıq qalıb. Belə ki, yeni asfalt örtüyü çəkildikdən sonra yolda sürət həddini aşan sürücülərin və yol-nəqliyyat hadisələrinin sayı artıb.

“Qafqazinfo” xəbər verir ki, bu şikayətlə Baku TV-yə rayon sakinləri müraciət ediblər. Onlar avtomobil yolunda sürət həddinə nəzarətin gücləndirilməsini tələb ediblər.

Sakinlərin sözlərinə görə, sürücülər yolda yüksək sürətlə hərəkət edir və müəyyən edilmiş sürət həddinə əməl etmirlər. Nəticədə indiyədək bir neçə ağır yol-nəqliyyat hadisəsi baş verib, ölən və yaralananlar olub.

Rayon sakini Təbiət Nağdəliyev sözügedən yolda iki nəvəsinin avtomobillə vurularaq öldürüldüyünü deyir: “Bu yolda mənim iki nəvəm öldü. Onları maşın vurdu. Buradan avtomobillər saatda 140-160 kilometr sürətlə hərəkət edir. Heç kim qaydalara əməl etmir. Yola nəzarət olunsun, tramplin qoysunlar, radar quraşdırsınlar, nə isə bir tədbir görsünlər”.

Digər sakinlər də yolda təhlükəsizlik baryerlərinin və sürət məhdudlaşdırıcı maneələrin olmadığını bildiriblər.

Məsələ ilə bağlı Daxili İşlər Nazirliyinin Baş Dövlət Yol Polisi İdarəsinə sorğu ünvanlanıb. Qurumdan bildirilib ki, Şəmkir rayonunda yeni təmir olunmuş Qədimqala-Miskinli-Keçili-Xuluf avtomobil yolunda hərəkət təhlükəsizliyinin təmin edilməsi istiqamətində tədbirlər görülür.

Hazırda aidiyyəti dövlət qurumu tərəfindən yolda hərəkətin təşkili və təhlükəsizliyin təmin olunması məqsədilə müvafiq yol nişanlarının və digər nizamlayıcı vasitələrin quraşdırılması işləri aparılır. Bununla yanaşı, ərazidə yol polisi tərəfindən mütəmadi xidmət təşkil olunur və mümkün qəzaların qarşısının alınması istiqamətində zəruri tədbirlər həyata keçirilir.

Daha ətraflı süjetdə: