ABŞ-ın Avropadakı hərbi kontingentinin ixtisarı əvvəl gözlənildiyindən daha məhdud miqyasda həyata keçirilə bilər.
“Bloomberg” agentliyinin mənbələrə istinadən məlumatına görə, Avropa ölkələri Vaşinqtonun qitədən təxminən 25 min hərbçisini çıxaracağından ehtiyat etsələr də, hazırda bu rəqəmin 5 min civarında olacağı gözlənilir.
Bildirilib ki, hazırda Avropada təxminən 80 min ABŞ hərbçisi yerləşdirilib.
Agentliyin məlumatına əsasən, ixtisarın miqyasının azaldılması NATO üzvü olan Avropa ölkələrinin müdafiə xərclərini artırması ilə əlaqədardır. Bu addım Vaşinqton tərəfindən müsbət qarşılanıb.
Bundan əlavə, Pentaqon rəhbərliyi İranla münaqişə fonunda ABŞ-ın Avropadakı hərbi mövcudluğunun əhəmiyyətini nəzərə alıb. Belə ki, İrana qarşı hərbi əməliyyatlar zamanı ABŞ Avropadakı bazalardan və müttəfiq ölkələrin hava məkanından istifadə imkanlarına arxalanır.
Məlumata görə, hərbi kontingentin ixtisarı əsasən Almaniyaya təsir edəcək, NATO-nun şərq cinahı isə gücləndiriləcək.
Qeyd olunur ki, ABŞ-ın müdafiə naziri Pit Heqset dekabrın 1-dək məsələ ilə bağlı yekun tövsiyələrini Prezident Donald Trampa təqdim etməlidir.
