Televiziya efirində kənd təsərrüfatı sahəsində tətbiq edilməsi gözlənilən yeni qaydalar və bələdiyyələrin bu prosesdəki rolu ətrafında qızğın müzakirə aparılıb. Efirdəki müzakirə zamanı aparıcı ilə qonaq arasında ciddi fikir ayrılığı yaranıb.
NOCOMMENT.az xəbər verir ki, efirdə müzakirə olunan əsas mövzulardan biri 2027-ci il yanvarın 1-dən etibarən tətbiq ediləcək qaydalar olub. Verilişin aparıcısı ironik şəkildə bildirib ki, Azərbaycanda bələdiyyələrin yaradılmasından təxminən 27 il keçdikdən sonra nəhayət onlara "iş tapılıb" və bundan sonra onlar gedib yumurta sayacaqlar. Aparıcı bu mövzunun absurdluğunu vurğulayaraq bələdiyyələrin bu funksiyanı yerinə yetirəcəyini müzakirəyə çıxarıb.
Məsələyə münasibət bildirən efir qonağı qeyd edib ki, söhbət təkcə yumurtanın sayılmasından, eləcə də yun və südün miqdarının ölçülməsi və tədarükündən ibarət deyil, burada kəndlinin xeyrinə olan məqsədlər də var. Bildirilib ki, bu tədbirlərin əsas məqsədlərindən biri ilk öncə kənd yerlərində istehsalı nəzarətdə saxlamaqdır.
Aparıcı isə buna sərt reaksiya verərək nəzarətdə saxlayıb nə ediləcəyini soruşub. Qonaq daxili bazarın ərzaqla təmin olunmasının əsas prioritet və istiqamət olduğunu vurğulayıb. Lakin aparıcı bu uçotun istehsalı artırmayacağını bildirərək, bunun stimullaşdırıcı tədbir deyil, yalnız mövcud vəziyyətin uçotunun dəqiqləşdirilməsi olduğunu qeyd edib: "Bu yalnız uçotun dəqiqləşdirilməsidir ki, bizdə nə qədər istehsal olunur, nə qədər istehlak olunur, istehsalçılar özləri nə qədər istehlak edir".
Müzakirə zamanı o da etiraf olunub ki, bu cür uçotların aparılması bəzən statistikada süni artımlara və manipulyasiyalara yol aça bilər. Belə ki, kimsə qapını döyüb nə qədər heyvanın, qoyunun və ya toyuğun olduğunu soruşduqda, ev sahibi dəqiq məlumat verməyə bilər və ya rəqəmlər təqribi yazılarla formalaşa bilər.
Əli,
NOCOMMENT.az
