Türkiyənin Antalya Beynəlxalq Hava Limanında Rusiyanın “Azimut” aviaşirkətinə məxsus təyyarədə bomba olması barədə məlumat daxil olduqdan sonra hava gəmisinin yoxlanılmasına başlanılıb.

Bu barədə Türkiyənin “Milliyet” qəzeti məlumat yayıb.

Məlumata görə, Mineralnıye Vodı–Antalya marşrutu üzrə uçuş həyata keçirən “Sukhoi Superjet 100” tipli təyyarə hava limanına təhlükəsiz eniş edib. Daha sonra hava gəmisi əsas terminaldan uzaqda yerləşən xüsusi təhlükəsiz dayanacağa aparılıb.

Təyyarədə olan 65 sərnişin və dörd ekipaj üzvü təxliyə edilib. Təhlükəsizlik əməkdaşları təyyarənin salonunu, yük bölmələrini, həmçinin sərnişinlərin və ekipaj üzvlərinin baqajlarını yoxlayırlar.

Yoxlamanın azı 1,5–2 saat davam edə biləcəyi bildirilir.

***

16:41

Mineralnıye Vodı şəhərindən Antalyaya uçan Rusiyanın “Azimut” aviaşirkətinə məxsus sərnişin təyyarəsində partlayış təhlükəsi barədə məlumat daxil olub.

Bu barədə Türkiyənin aviasiya portalı “AirportHaber” portalı məlumat yayıb.

Məlumata görə, söhbət Sukhoi Superjet 100 tipli, A46217 reys nömrəli təyyarədən gedir. Hadisə ilə əlaqədar Türkiyənin müvafiq aviasiya və təhlükəsizlik xidmətləri gücləndirilmiş hazırlıq rejiminə keçirilib.

Bildirilir ki, təyyarə uçuşunu Türkiyə istiqamətində davam etdirib. Antalyaya endikdən sonra hava gəmisinin təhlükəsiz zonaya aparılması və partlayıcı qurğunun olub-olmamasının yoxlanılması planlaşdırılır.