ABŞ Federal Mülki Aviasiya İdarəsinin (FAA) ölkə ərazisindəki bütün hava limanlarından uçuşların dayandırılması barədə bildirişi fonunda 12 mindən çox reys ləğv edilib və gecikdirilib.
"Report" xəbər verir ki, bunu "FlightAware" portalının məlumatları göstərir.
Bakı vaxtı ilə şənbə günü saat 03:04-ə olan rəqəmlərə əsasən, bütün ölkə üzrə 1 913 reys ləğv edilib və 10 min 494 reys gecikdirilib.
Daxili təhlükəsizlik naziri Markueyn Mallin jurnalistlərə bildirib ki, federal hökumət insidenti araşdırır və hələlik bunun hücum olduğuna dair heç bir əlamət yoxdur və hər kəs təhlükəsizlikdədir.
"Hazırda bu, sadəcə telekommunikasiyanın işində yaranmış nasazlıqdır", - o, jurnalistlərə deyib.
Daha sonra FAA-dan bildirilib ki, uçuş qadağası qüvvədə qalır, lakin infrastruktur bərpa olunduqca bəzi aviareyslərə icazə veriləcək.
01:55
ABŞ Federal Mülki Aviasiya İdarəsi (FAA) aviadispetçerlərin avadanlığında yaranan problemlər səbəbindən ölkə ərazisindəki bütün hava limanlarından uçuşları dayandırıb.
"Report" xəbər verir ki, bu barədə FAA-nın bildirişində deyilir.
"Uçuşlara qoyulan məhdudiyyət fövqəladə hallar və təhlükəsizlik mülahizələri ilə əlaqədar tətbiq edilib. Bütün hava limanlarında uçuşlara qadağa qoyulub. Bütün yola düşən reyslər sonrakı göstərişlərə qədər hava limanında qalmalıdır", - sənəddə qeyd olunur.
İdarədən izah ediblər ki, bu, uçuşların idarə edilməsi sisteminin işinə təsir göstərən FAA avadanlığının sıradan çıxması ilə əlaqədardır.
