ABŞ Federal Aviasiya Administrasiyası (FAA) hava nəqliyyatının idarə olunması mərkəzlərində yaranan ciddi rabitə problemi səbəbindən ölkə daxilindəki bütün hava limanları üçün “yerüstü dayanacaq” əmri verib.

“Qafqazinfo” “Reuters”ə istinadən xəbər verir ki, ABŞ-nin nəqliyyat katibi Şon Daffi problemin bütün ölkəni əhatə edən rabitə qüsurundan qaynaqlandığını təsdiqləyib.

FAA nümayəndələri bu tədbirin fövqəladə hallar və təhlükəsizlik narahatlıqları səbəbindən tətbiq olunduğunu açıqlayıblar. 

Qərar zamanı havada olan təyyarələrin təyinat məntəqələrinə normal şəkildə eniş etməsinə icazə verilib, lakin reysini gözləyən bütün digər təyyarələrin növbəti xəbərdarlığa qədər yerdə qalması əmr edilib. Xaricdən ABŞ-yə uçan reyslər isə hər bir hal üçün ayrıca qiymətləndirilir.

Qeyd edək ki, bu hadisə 11 sentyabr 2001-ci il terror aktlarından bəri ABŞ-də ölkə miqyasında bütün uçuşların dayandırıldığı ikinci hadisə kimi tarixə düşüb. Bundan əvvəlki analoji hal 2023-cü ilin yanvar ayında qeydə alınmış və həmin vaxt ABŞ Federal Aviasiya Administrasiyası (FAA) bütün daxili reysləri iki saatdan az müddətə təxirə salmışdı.

***

ABŞ Federal Aviasiya Administrasiyası (FAA) cümə günü ölkə daxilində uçuşların saatlarla dayanmasına səbəb olan qadağanı ləğv edib. Rabitə problemləri səbəbindən tətbiq edilən bu fasilə bütün ölkə üzrə hava limanlarında uçuş cədvəllərinin pozulmasına və aviaşirkətlərin ciddi gecikmələrlə üzləşməsinə yol açıb.

Daxili Təhlükəsizlik Naziri Markveyn Mallin Ağ Evin qarşısında jurnalistlərə müsahibəsində deyib ki, hazırkı məqamda baş verənlərin ABŞ üçün bir təhlükə olduğunu deməyə əsas yoxdur. Lakin jurnalistlərin bu pozuntunun kiberhücum və ya süni intellekt müdaxiləsi nəticəsində baş verib-verməməsi ilə bağlı sualına nazir “Bu, məlum deyil” cavabını verərək, həmin versiyaları istisna etməyib. Həmçinin FAA-nın bu həftə ölkə miqyasında istifadəyə verdiyi süni intellektə əsaslanan SMART adlı yeni hava hərəkəti alətinin qəzada rolu olub-olmadığı soruşulduqda, Mallin “Biz bunu nəzərdən keçiririk” deyə bildirib.

FAA yaydığı bildirişdə qərarın “fövqəladə hallar və təhlükəsizlik səbəbindən” verildiyini açıqlayıb. Ölkənin köhnəlmiş hava hərəkəti sistemindəki genişmiqyaslı nasazlıq kütləvi gecikmələrə, uçuşların ləğvinə və ciddi iqtisadi itkilərə səbəb olub.