İspaniyanın Milli Məhkəməsi 83 yaşlı dünyaşöhrətli müğənni Xulio İqlesias barəsində cinsi istismar iddiaları ilə bağlı rəsmi araşdırmaya başlayıb.

“Qafqazinfo” “Reuters”ə istinadən xəbər verir ki, müğənninin iki keçmiş qadın işçisi (biri ev xidmətçisi, digəri isə fizioterapevt) 2021-ci ildə onun Baham adaları və Dominikan Respublikasındakı mülklərində çalışarkən cinsi istismara və fiziki zorakılığa məruz qaldıqlarını iddia ediblər.

Madrid məhkəməsinin yaydığı bəyanatda bildirilir ki, istintaq cinsi təcavüz, bədən xəsarəti yetirmə və alçaldıcı rəftar daxil olmaqla “cinsi azadlığa qarşı cinayətlər” maddələri üzrə aparılacaq. İnsan alveri və əmək hüquqlarının pozulması ilə bağlı əlavə ittihamlar isə rədd edilib.

Məhkəmə şikayətçilərdən birinin təqdim etdiyi fotoşəkillərdəki göyərmə və bədən izlərinin zorakılıq ehtimalına uyğun gəldiyini qeyd edərək cinayət işinin başlanmasını əsaslı hesab edib. Şikayətçilər fevralın 3-də ifadə vermək üçün məhkəməyə çağırılıblar.

Qeyd edək ki, ilkin şikayət yanvar ayında hadisələrin ölkə xaricində baş verməsi və yurisdiksiya çatışmazlığı əsas gətirilərək rədd edilmişdi. Lakin qadın hüquqlarını müdafiə edən “Women's Link Worldwide” təşkilatının və prokurorluğun müdaxiləsindən sonra İspaniya vətəndaşının xaricdə törətdiyi əməllərin ölkə məhkəməsində araşdırıla biləcəyi təsdiqlənib və sentyabrda verilən ikinci ərizə icraata qəbul olunub.

“Qremmi” mükafatı laureatı Xulio İqlesias isə ona qarşı irəli sürülən bütün ittihamları “tamamilə əsassız” adlandıraraq təkzib edib. O, heç vaxt heç bir qadına qarşı zorakılıq etmədiyini və hörmətsizlik göstərmədiyini bəyan edib.