İran molla rejiminin qorxusu

 

Azərbaycan və İsrail dövləti arasındakı xoş münasibətlər ölkəmizdəki iranpərəstləri, dindarları çox qıcıqlandırır. Öz fantaziyalarına əsasən paytaxtımızda inşa edilmiş tikililəri massonların simvolları hesab edərək ictimai yerlərdə yəhudilərə qarşı yanlış təbliğat aparırlar. Pərgar, üçbucaq, piramida təsvirli nə görürlərsə onu yəhudiliklə əlaqələndirirlər. “İçərişəhər” və “Koroğlu” mertro stansiyalarının, “Səadət” sarayının, “Filarmoniya” bağındakı fəvvarənin ətrafında olan sütunların yəhudilərə məxsus işarələri özündə əks etdirdiyi barədə söhbətləri mütləq eşitmisiz. Bildiyiniz kimi İran respublikasının İsrail dövləti ilə münasibətləri açıq düşmənçilik xarakteri daşıyır. Ölkəmizdə isə İran molla rejiminin təsiri altında olan çoxlu sayda dindar insanlar var. Bakının kəndləri zatən iranlaşıb. Şəhərin özündə isə əhalinin yarıdan çox hissəsi şiələşib. Onların sayı hər gün artır. Bunu iş yerinizdə, yaxın ətrafınızda asanlıqla müşahidə edə bilərsiz. Bu adamların enerji aldıqları İran molla rejiminin təbliğatı nəticəsində ölkəmizdə İsrail dövlətinə qarşı mənfi rəy formalaşdırırlar və yəhudilərə qarşı cəmiyyətin nifrətini yaratmağa çalışırlar. 

Azərbaycan-İsrail münasibətlərinin ölkəmizin müstəqilliyinin ilk illərindən yarandığını və inkişaf etdiyini söyləsək yanılmarıq. Azərbaycan dövləti İsraillə təkcə siyasi əlaqələrin inkişafına xüsusi diqqət ayırmayıb. Eyni zamanda beynəlxalq yəhudi lobbisi ilə diaspor əlaqələrinin möhkəmlənməsinə də böyük önəm verib. Nəticədə bu gün Azərbaycanla İsrail strateji tərəfdaş ölkələrə çevrilib və beynəlxalq aləmdə bir-birlərinə qarşılıqlı dəstəklərini nümayiş etdirirlər.

Azərbaycan və İsrail arasında qarşılıqlı dostluq və əməkdaşlıq əlaqələri həm də ənənəvi tarixi, mədəni köklərə əsaslanır. Azərbaycan dünya yəhudi elitasının diqqət mərkəzinə 1810-cu ildən düşməyə başlayıb. Həmin dövrdə aşkenazilər ilk dəfə olaraq Bakıda məskunlaşmağa başlayıblar. 1832-ci ildə isə yəhudilərin Bakıda ilk ibadət evləri inşa edilib. Bakıda neft çıxarılmağa başlandıqdan sonra 1870-ci ildən Azərbaycana yəhudi biznes nümayəndələrinin axını başlayıb. Q.Polyak, A.Dembo, X.Kaqan, Q.Qinzburq, A.Feyqel ölkəmizdə geniş fəaliyyət göstəriblər. Hazırda paytaxtımızda yəhudilərin 3 sinaqoqu mövcuddur. Bir sinaqoq isə Azərbaycanın Quba rayonunda, dağ yəhudilərinin iri icmasının məskunlaşdığı Qırmızı Qəsəbədədir. Bu, keçmiş Sovet İttifaqı ərazisində yəhudilərin kompakt yaşamaqda olduğu yeganə yerdir.

İkinci Qarabağ müharibısində İsrail dövlətinin ölkəmizə etdiyi açıq dəstəyi hamınız çox gözəl müşahidə etmisiz. Hətta bunun müqabilində İsrailə təşəkkür naminə həmin dövlətin bayrağını öz mülklərinin üzərində nümayiş etdirən insanlar belə var idi. Bəs ölkəmizdə şiə ordusu yaradan qonşu İran nə edirdi? Ermənistana silah-sursat yardımı etməklə yanaşı, savaş zonasında sərhəddə ordumuzun danışıqlarını dinləyərək düşmən tərəfə məlumatlar ötürürdü. İran molla rejiminin təsiri altında olan dindarların ölkəmizdə sayı artdıqca allah və şəriət naminə zamanı geri çəkmək niyyətindədirlər. Onların düşünmə tərzinə görə elmdən uzaq şəriət qaydaları ilə yaşamaq bir dəyərdi. Əslində bu fikiri onların dərin düşünmək istəməyən başlarına soxan fars molla rejimidi. Elmi inkişafı qəbul etməyən bu kütlə yığını cəmiyyətin inkişafının qarşısına atılmış daş kimidir. İranın dini rəhbəri Xameneidən göstərişlər, təlimatlar alan ölkəmizdəki dindarlar ölkəmizin nüfuzunu aşağı salmaq üçün hər cür oyunlara əl atırlar. Onların məqsədi elmdən, mədəni inkişafdan uzaq şəriət dövləti qurmaq və ya İranın bir parçası olmaqdır. Vəziyyətdən çıxış yolu ölkə olaraq elmə, sivil inkişafa daha çox diqqət ayırmaqdadır. Cəmiyyətin elmdən uzaq toplumu İran mollalarının təsiri altında olduqca heç bir yüksəlişə nail olmaq mümkün deyil. Məhz ölkəmizdə Azərbaycan-İsrail münasibətlərinə kölgə salan, onu pisləyən də dindarların şiə qruplaşmasıdı. Təsir altında olan dindarlar həm insanlığa, həm də dövlətin təhlükəsizliyinə ciddi təhlükə mənbəyidirlər. Din deyil, yalnız müasirləşmək və elmi aydınlanma bizi sivil, inkişaf etmiş dövlətlər sırasına qoşa biləcək.