Bir parça bayraq

Bildiyiniz kimi Azərbaycan dövlət rəmzləri dövlət bayrağı, gerbi və himnindən ibarət bir üçlükdür.  Həmçinin onu da bilirsiz ki, rəmz dedikdə fikri işarə, rəsm ilə ifadə etmək nəzərdə tutulur. Rəmz, həm də tanımağa imkan vermək məqsədi güdür. Məsələn, bayrağı göstərəndə artıq bilinir ki, bu hansı ölkədir. Bunu gerb ilə də müəyyən etmək olur. Ancaq bütün ölkələrin gerbini hamı yadda saxlaya bilmir və bu bayraq qədər məşhur simvol deyil. Himnə gəldikdə isə çox az adam onu dinləyib hansı ölkəni ifadə etdiyini söyləyə bilər. Rəmz yalnız dövləti tərənnüm etmir. Şirkətlərə, idman klublarına və s. hüquqi obyektlərə baxsanız görərsiz ki, özlərini ifadə edən, tanıdan bir rəmzi var, bayrağı var. Deməyim odur ki, bayrağı bu qədər müqəddəsləşdirməyin. Adi bir parçadan ibarət rəmzdir. Onun üçün ölməyin və öldürməyin. Dövləti sevmək- üzünə bayraq rəsmi çəkib ölkəni geriyə sürükləyən davranışlar etmək deyil. Dövləti sevmək- kreslosunun sağ və ya sol yanında hündür üç rəngli bayrağımızı qoyaraq layihələrdə şişirdilmiş rəqəmlər göstərib dövlət büdcəsinin miqdarını azaltmaqla olmur. Bayrağı saxta öpüşlərinizə qərq etmədən də dövləti sevə bilərsiz. Yetər ki, bunu istəyin. Dövlət yuxarıda qeyd etdiyim üç atributdan ibarət deyil. Xalq olmadan dövlət də olmaz, hakimiyyət də. Dövləti sevmək üçün ilk növbədi xalqı sevmək lazımdır. Xalqı mədəniləşdirmək, maarifləndirmək və rifahını yüksəltmək ən böyük dövlət sevgisi olmalıdır.

Aciz insanlar dinə pənah apardığı kimi, kütlənin vətənsevər hissiyatını bayraqla ovundururlar. Ac olsan da olar, əsas odur ki, əlində bayraq başının üzərəndə dalğalandır. Məmurların deyil, məhz xalqı formalaşdıran sadə ailənin övladı cəbhədə həlak olur üzərinə bayraq atıb “vətən sağolsun” deyərək, insanları susdururlar. Sanki bayraqla şantaj edirlər. Yəni, bayraq müqəddəsdir. Əgər bir söz desən dövlətə qarşı çıxırsan demək ki. Ona qalsa İŞİD-in də bayrağı var və o bayraq altında başlar kəsib, canlar alır. Bax beləcə, sadəcə yoldaşlar. İnsan kimi yaşamaq istəyirsizsə, əşyaları və şəxsləri müqəddəsləşdirməyin. Sadəcə dövləti sevin və onun inkişafı üçün çalışın.